२४ घण्टा नबित्दै बालुवाटारमा मन्त्रिपरिषद बैठक

काठमाडौँ, जेठ ९ – आज अकस्मात मन्त्रिपरिषद बैठक बस्दैछ । मन्त्रिपरिषद बैठकमा सहभागि हुन अधिकांश मन्त्रिहरु बालुवाटार पुगिसकेका छन् । बजेट, दोस्रो चरणको चुनाव र प्रधानमन्त्रीको राजिनामा लगायतका विषयमा छलफल गर्न मन्त्रीपरिषद् बैठक बोलाइएको हो । मन्त्रीपरिषद बैठकमा प्रधानमन्त्री प्रचण्डले पूर्व सहमतिअनुसार सत्ता हस्तान्तरणका विषयमा समेत मन्त्रीहरुलाई ब्रिफिङ गर्ने बताइएको छ । प्रधानमन्त्रीको सरकारी निवास बालुवाटारमा बस्ने बैठकले अन्य महत्वपूर्ण निर्णयहरु समेत गर्ने बताइएको छ । मधेसवादी दलहरुलाई दोस्रो चरणको निर्वाचनमा सहभागि सुनिश्चित गर्न भन्दै सोमबार बेलुका बसेको मन्त्रिपरिषद बैठकले २२ स्थानीय तह थपेको थियो । तर, त्यसप्रति प्रमुख प्रतिपक्ष दल एमालेले विरोध गरेको छ । आजै बोलाइएको संसद बैठकमा एमालेले सरकारको स्थानीय तह थप्ने निर्णयको विरोध गर्ने तयारी गरेको छ ।