प्युठानमा पहिरोले घर पुरिँदा किशोरीको मृत्यु

१८ असार, प्युठान । प्युठानको गौमुखी गाउँपालिका ३ रजवारामा पहिरोले घर पुरिँदा एक किशोरी वेपत्ता भएकी छन् । गएरातिको अविरल वर्षासँगै झरेको पहिरोले केरबहादुर घर्तीको घर पुरिँदा उनकी १६ वर्षीया छोरी तुलसा घर्ती वेपत्ता भएकी हुन् । केरबहादुर र उनकी श्रीमतीको भने स्थानीयले उद्धार गरेका छन् । उनीहरुको छोरीलाई भने भेटाउन नसकिएको स्थानीय गोवर्द्धन थापाले जानकारी दिए । पहिरोले रजवाराका ३ वटा पुल र३ वटा घरमा क्षति पुगेको छ । रजवारामा रहेको लद्यु जलविद्युतमा पनि क्षति पुगेको छ । सो क्षेत्रमा रातिदेखि नै विद्युत सेवा अवरुद्ध छ । मोबाइल सम्पर्क पनि विच्छेद भएको छ । उद्धारका लागि प्रहरी टोली घटनास्थलमा पठाइएको जिल्ला प्रहरी कार्यालयका प्रमुख रञ्जित सिंह राठौरले जानकारी दिए । गत वर्ष प्युठानका बिभिन्न स्थानमा आएको बाढी र पहिरोका कारण ५४ जनाको मृत्यु भएको थियो ।